युवा चेतनाको उज्यालो अभ्यास : जनसेवा विद्यार्थी व्यवस्थापन समिति
नारायण अधिकारी
लम्की – नेपालको वर्तमान सामाजिक र राजनीतिक परिवेश हेर्दा युवाहरूको भूमिका केवल भविष्यको आशा मात्र नभई वर्तमानको जिम्मेवारी पनि बनिसकेको छ । यस्तो अवस्थामा, युवाहरू आफैँ अघि सरेर आफ्नो विद्यालय, समाज र देशको लागि नेतृत्वदायी भूमिका निर्वाह गर्नु अत्यन्त जरुरी देखिन्छ । यही सन्दर्भमा, मेरा जनसेवा माध्यमिक विद्यालयका साथीहरू तथा जुनियर भाइबहिनीहरू मिलेर स्थापना गरिएको जनसेवा विद्यार्थी व्यवस्थापन समिति आज युवाचेतनाको एक उज्यालो उदाहरणका रूपमा उभिएको छ ।
“आफ्नो विद्यालय र आफ्नो क्षेत्र आफैँ बनाउनु पर्छ” भन्ने स्पष्ट उद्देश्यका साथ यो समिति गठन गरिएको रहेछ । केवल नारामा सीमित नभई व्यवहारमै उतार्ने दृढ संकल्प बोकेर, “कामको थालनी म आफैँ गर्छु” भन्ने सोचका साथ अगाडि बढ्नु नै युवाको सबैभन्दा ठूलो जिम्मेवारी हो । यो सोचले नेपाली समाजमा फैलिँदै गएको निराशा, वैदेशिक पलायन र उदासीनतालाई चुनौती दिन सक्छ र यो सोच जनसेवा विधार्थी व्यवस्थापन समितिमा प्रष्ट देखिएको छ
जनसेवा विद्यार्थी व्यवस्थापन समितिको नेतृत्व संरचना पनि निकै सन्तुलित र जिम्मेवार देखिन्छ ।
समितिका अध्यक्ष श्री ईश्वर धमाला नेतृत्व क्षमताका साथ अनुशासन, समन्वय र मार्गदर्शनमा केन्द्रित देखिन्छन् । उपाध्यक्ष विध्या ढकाल सक्रिय सहभागिता, समावेशिता र संगठनात्मक सुदृढीकरणमा महत्वपूर्ण भूमिका निर्वाह गरिरहेकी छिन् । त्यस्तै, सचिव तपेन्द्र धमाला योजनाको अभिलेख, सूचना प्रवाह र कार्यान्वयनमा स्पष्टता ल्याउने भूमिकामा छन् । यी तीनै जनाको सहकार्यले समिति केवल नामको संस्था नभई कर्मको संस्था बन्न सफल भएको छ ।
समितिले हालसम्म गरिरहेका गतिविधिहरू हेर्दा विद्यालय सरसफाइ, अनुशासन प्रवर्द्धन, विद्यार्थी सहभागिता अभिवृद्धि, सामाजिक सचेतना कार्यक्रम, तथा शैक्षिक गुणस्तर सुधारका प्रयासहरू उल्लेखनीय देखिएका छन् । यी कार्यहरूले विद्यार्थीहरूलाई केवल किताबी ज्ञानमा सीमित नराखी व्यवहारिक, नैतिक र सामाजिक रूपमा पनि सबल बनाउने गर्छ।
नेपाल अहिले राजनीति अस्थिरता, अवसरवाद र जनविश्वासको संकटबाट गुज्रिरहेको अवस्थामा, युवाहरूको यस्तो सकारात्मक हस्तक्षेप अत्यन्त आवश्यक छ । आजको युवा वर्गले राजनीति भनेको केवल सत्ता र पद होइन, सेवा, जिम्मेवारी र दीर्घकालीन सोच हो भन्ने सन्देश दिनु जरुरी छ । जनसेवा विद्यार्थी व्यवस्थापन समितिको पहलले यही सन्देशलाई व्यवहारमा उतारिरहेको देखिन्छ ।
यद्यपि, आगामी दिनमा समितिले अझ प्रभावकारी बन्नका लागि केही थप क्रियाकलापहरू समेट्न सक्ने सम्भावना पनि छ । जस्तै:
- नेतृत्व विकास तथा सार्वजनिक वक्तृत्व कला तालिम
- लोकतन्त्र, संविधान र नागरिक कर्तव्यसम्बन्धी छलफल कार्यक्रम
- लागूपदार्थ दुरुपयोग, डिजिटल सचेतना र मानसिक स्वास्थ्यसम्बन्धी अभियान ।
- स्थानीय समुदायसँग सहकार्य गर्दै सामाजिक सेवा कार्यक्रम ।
- वातावरण संरक्षण तथा हरियाली प्रवर्द्धनका अभियान ।
यी क्रियाकलापहरूले विद्यार्थीहरूलाई केवल विद्यालयभित्र सीमित नराखी समाजसँग जोड्नेछन् र भावी जिम्मेवार नागरिकका रूपमा तयार पार्नेछन् ।
समग्रमा भन्नुपर्दा, जनसेवा विद्यार्थी व्यवस्थापन समिति केवल एउटा विद्यार्थी संगठन मात्र होइन, यो युवा आत्मनिर्भरताको अभ्यास हो, सामाजिक उत्तरदायित्वको पाठशाला हो र भविष्यको सक्षम नेतृत्वको बीउ हो । यस्ता प्रयासहरूले नै नेपाली समाजमा सकारात्मक परिवर्तन सम्भव बनाउँछन् । यदि आजका युवाहरू यस्तै सोच, साहस र समर्पणका साथ अघि बढ्ने हो भने, नेपालले उज्यालो भविष्य पक्कै देख्नेछ । म सम्पुर्ण सदस्य हरुलाई बधाई तथा भविष्य निमित्त शुभकामना दिन चाहान्छु ।
भरत रिमाल यस नव त्रिवेणी मिडिया द्वारा संचालित त्रिवेणी टुडे अनलाईन पत्रिकाका अध्यक्ष तथा संचालक हुनुहुन्छ। जनताकाे निष्पक्ष आवाज बोल्नु हुन्छ। उहाँ विभिन्न समसामयिक विषयवस्तु, राजनीतिक र समाजमा भइरहेका विभिन्न विषयवस्तुमा रहेर कलम चलाउँदै पत्रकारिता गर्नुहुन्छ।
सम्पर्क नं: ९८४१४१२०७७