नेपाली कांग्रेस १५औँ महाधिवेशन: लम्कीचुहा नगर सभापतिमा टेकराज कठायतको उम्मेदवारी
लम्की – नेपाली कांग्रेसको १५औँ महाधिवेशनको सन्दर्भमा कैलाली क्षेत्र नं. २ अन्तर्गत लम्कीचुहा नगरपालिकाको नगर सभापति पदमा टेकराज कठायतले उम्मेदवारी घोषणा गरेका छन्।
लम्कीचुहा नगरपालिका वडा नं ०१ लम्की निवासी कठायतले बदलिँदो राजनीतिक परिस्थिति, जनताको अपेक्षा र पार्टी भित्र देखिएका संगठनात्मक आवश्यकतालाई सम्बोधन गर्ने उद्देश्य सहित नगर सभापति पदमा आफ्नो उम्मेदवारी प्रस्तुत गरेको बताएका छन्।
कठायतले नेपाली कांग्रेसलाई समयअनुकूल, सैद्धान्तिक रूपमा स्पष्ट, संगठनात्मक रूपमा व्यवस्थित र जनतासँग अझ नजिक जोडिएको पार्टीका रूपमा अघि बढाउनुपर्ने आवश्यकता रहेको बताएका छन्। उनले पार्टीको नीति, विचार र संगठनलाई थप सुदृढ गर्दै कार्यकर्ताको भूमिका प्रभावकारी बनाउने विषयलाई आफ्नो उम्मेदवारीको प्रमुख आधारका रूपमा प्रस्तुत गरेका छन्।
“मेरो उम्मेदवारी कुनै व्यक्तिगत पद वा प्रतिष्ठाका लागि मात्र होइन, सुदृढ संगठन, सक्षम नेतृत्व, सक्रिय कार्यकर्ता र जनतासँग अझ नजिक जोडिएको नेपाली कांग्रेस निर्माण गर्ने उद्देश्यका साथ हो,” कठायतले आफ्नो अपिलमा उल्लेख गरेका छन्।
विद्यार्थी राजनीतिदेखि पार्टी संगठनसम्म
कठायतले आफ्नो राजनीतिक तथा सामाजिक यात्रामा विभिन्न जिम्मेवारी निर्वाह गरेको उल्लेख गरेका छन्। उनका अनुसार उनले राष्ट्रिय नमुना माध्यमिक विद्यालय, मोतिपुरको नेपाल विद्यार्थी संघको सभापति हुँदै कैलाली क्षेत्र नं. २ को क्षेत्रीय सचिव तथा नेपाली कांग्रेस कैलाली जिल्ला पूर्व सल्लाहकार सदस्यको जिम्मेवारीसमेत सम्हालेका छन्।
देश तथा विदेशका समसामयिक राजनीतिक र आर्थिक विषयको अध्ययन, अनुभव तथा संगठनमा रहेर प्राप्त गरेको ज्ञानलाई आगामी दिनमा पार्टी र जनताको हितमा उपयोग गर्ने प्रतिबद्धता पनि उनले व्यक्त गरेका छन्। उनले संगठनलाई केवल निर्वाचन केन्द्रित संरचनाका रूपमा नभई निरन्तर जनतासँग जोडिने, कार्यकर्ताको भावना सम्बोधन गर्ने र सामाजिक क्षेत्रमा प्रभावकारी भूमिका निर्वाह गर्ने संरचनाका रूपमा विकास गर्नुपर्ने धारणा अघि सारेका छन्।
“एक मत संगठन निर्माणप्रतिको विश्वास पनि हो”
नगर सभापतिको उम्मेदवारीसँगै कठायतले नेपाली कांग्रेसका क्षेत्रीय प्रतिनिधिहरूसँग सहयोग र समर्थनका लागि अपिल गरेका छन्। उनले आफूलाई योग्य ठानेर अमूल्य मत प्रदान गरेमा पार्टी संगठनमा रहेर अझ फराकिलो रूपमा जनसेवा गर्ने अवसर प्राप्त हुने बताएका छन्।
“तपाईंहरूको एक मत केवल मेरो उम्मेदवारीको समर्थन होइन, संगठन निर्माण र जनसेवाप्रतिको तपाईंहरूको विश्वास पनि हुनेछ,” कठायतको अपिलमा भनिएको छ।
कठायतले आफ्नो उम्मेदवारीसँगै “समृद्ध लम्कीचुहा, सबल नेपाली कांग्रेस” भन्ने अवधारणालाई अघि सारेका छन्। नगर सभापतिको नेतृत्व चयनसँगै लम्कीचुहामा कांग्रेसको आगामी संगठनात्मक दिशा, नेतृत्वको कार्यशैली र कार्यकर्ताबीचको समन्वयलाई समेत महत्त्वपूर्ण रूपमा हेरिएको छ।
भरत रिमाल यस नव त्रिवेणी मिडिया द्वारा संचालित त्रिवेणी टुडे अनलाईन पत्रिकाका अध्यक्ष तथा संचालक हुनुहुन्छ। जनताकाे निष्पक्ष आवाज बोल्नु हुन्छ। उहाँ विभिन्न समसामयिक विषयवस्तु, राजनीतिक र समाजमा भइरहेका विभिन्न विषयवस्तुमा रहेर कलम चलाउँदै पत्रकारिता गर्नुहुन्छ।
सम्पर्क नं: ९८४१४१२०७७